لو ربنا فك عقدتك واتخطبتي

آنستي العزيزة.. لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد..

أجمل ما في الخطوبة العزومات الرومانسية .. على أحلى محلات أكل ف البلد.. واللي عمرك مانتي شايفاها بعد الجواز.. المهم نصائحي لك عند أي عزومة مع ختيبك.. قلنا رقَّه ....

1- الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا

2- العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري.. أوعي.. العيش بيتقطع بالسكينة ف الطبق.. وبعدين تاخدي لقمة.. لقمة.. بالعافية.. قال يعني نفسك مسدودة.. اضغطي على أعصابك جدااا وبعدين لما تروَّحي.. إبقي حِفِّي زي مانتِ عايزه... .

3- الشوووربة.. أبوس كعب رجلك.. بند الشوربة ده مهم جدًاااا.. الشوربة تتشرب من غير صوت خالص. . ومن غير ماتقعدي تنفخي فيها.. زي القهوجي اللي بينفخ ف الحجر للزبون.. وطبعًاااااا عايزك تنسى تمامًا.. السلطانية اللي بتقيميها على بقك ف البيت.. وتدلدقي على روحك.. بالمعلقه وبدون صوت.. سخنة ولعة برضه بدون صوت.. وتسيبي تلت الطبق ع الأقل.. مش تميليه.. عشان تلهطيها لآخر نقطة.....

4- الرز طبعاً .. بيتاكل بالشوكة.. أوعي إيدك تتمد ع المعلقة. . وتغرفي من طبق الرز وتعبي.. إوعي.. الرز بالشوكة.. وكأنك بتبوسيه مش بتاكليه..

5- المكرونة.. الاسباكتي.. برضه بالشوكة.. تتلف على طرف الشوكة.. لحد ما تخلص وبعدين تحطيها ف بؤك من سكات.. مش تشفطي المكرونة عود عود..

6- السمك.. مشكلة.. شوفي.. بتفصلي اللحم عن الشوك.. إزاي..؟؟ تقطعي اللحم من النص.. بالطول وبعدين تفردي اللحم ع الجانبين ولما تخلصي ناحية.. متقلبيش السمكة.. بلاش فلح.. شيلي السلسلة بالشوكة والسكينة وحطيها ف جنب الطبق وكملي أكل النص التاني.. وبدل الفيلم الهندي ده.. نصيحة.. ماتكليش السمك خالص.. قولي مابحبش السمك وخلصي نفسك..

7- الجمبري.. -إذا كنتي عارفاه-.. أول ماطبق الجمبري ينزل.. بصيله بقرف واحتقار شديدين.. آل يعني زهقانة من كتر أكل الجمبري الجامبو ف بيت ببااااا.. وأتنهدي جامد وقولي.. برضه..؟؟؟ وتروحي قاطعة راس الجمبريياية.. بالشوكة.. أنا ف عرضك إنسي المصمصة دلوقت..

8- البطاطس سواء مسلوقة أو محمرة.. أوعي تهرسيها وتدبيها ع الرز وتدي ...لا..لآ...لآ...بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي..

9- الفاكهة.. لو الفاكهة فيها بذر.. طلعيه من بؤك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزه.. أوعي ياحبيبتي من نظام التفتفة للبذر.. إنسي....

10- ولما تخلصي أكل تحطي إيدك على بطنك.. -اللي عصافيرها بتصوصو من العينات اللي كلتيها-.. وتقولي له مش ممكن.. أنا عمري ما اتفجعت كدة.. أنا أودامي أسبوع.. هابطل أكل فيه.....

وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. آل يعني بتمسحي بؤك..

وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك.. لفة الفول والطعمية اللي جايباها معاكي.. وبالهنا والشفااااااااااااا

هههههههههههههههههههههههههههههههههههه بلاها جوازه وعلى ايه التقفيله السودا دى منا باكل فى بتنا برحتى

ايه ياعمور انت بتعقدنا من الجواز ولا ايه خلاص ادينى اعده فى اربزكو بلا جواز بلا حرقه دم
لالالالالالا بس سيبك انت موضوع جاااااااااااااااااااااااااااااااااااااااااااااااااامد اخر حاجه ايوه كده ارجعلنا بمواضيغك الجامده دى

بقي كدااااااا يا عمرو انت رجعت تعلن الحرب علينا تاني ولا ايه
بس علي فكرة احنا البنات اخر دلع واخر شياكة ونشرف في اي مكان نروحه قول للشباب الكلام دا
دا احنا ملوك الاناقة والاتيكيت

لا بس بجد موضوع جامد واخيرا رجعتلنا تاني رغم انك راجع بموضوع تقيل اوي بس زي العسل

واااااااااااااااااااااااااااااااااو

موضوع روعه يا عموووووووووووووووور

رغم انك مشحورنا خاااااااااااااااااااااااااالص

بس ادينا اخدنا معلوه منك بتاعة الفول والطعميه دي

علشان نعمل حسابنا لما ربنا يفك عقدتنا ونتخطب زي ما قلت

متعرفش بتاع فول وطعميه حلو علشان ابقي اشتري منه ؟

ايييييييه ياعمرو ده حد قالك اننا مدخلناش مطاعم قبل

كده وبعدين هو يطول اصلا ده كفاية انو خطب وحدة
فينا ده ينطبق عليه المثل الى بيقول ده قصر ديل يازعر
وبعدين قال يعنى الولاد هما الى زووق ازى فى الاكل
دنتو بتلهفو الساندويتش فى قطمة ولا منظركو وانتو منطورين على القهاوى
سوووووو باااااااد يامان Mad

والشيشة فى بقكو تقول لسه متفطمتوش
وبعدين انا اكل براحتى وزى منا عيزة والى مش عجبوة يطلع برة
وبعدين يعنى اكل كده فى الخطوبة وبعد الجواز يقولى انى ضحكت عليه
لا هو يشربها من الاول استحمل استحمل
والجمبرىىىىى يابنى ميتكلش غير بالايد تفصص وتاكل برواقة وبمزاج
شغل الفشخرة الكدابة ده ميشبعش مبقاش دفعه فى طبق الجمرى قد كده وفى الاخر
اتفرج عليه ده غير ان ديه حاجة ميتشبعش منها حتى لو كنت باكلو كل يوم
ومتخفش مش بعمل صوت وانا بشرب الشربة لانو الصوت فى الاكل بينرفزنى مع ان الولاد هما الى بيعملو الصوت
ولو الشربة سخنةةة حنفوخخخ انشالله حتى يطير هو امال اتلسع انا Very Happy

الشغل ده مينفعش معايا ليه

هههههههههههههههههههههههههههههههههههههههههههههههههههه
ماشى ياست مى عاملالى فيهاااااااااااااااااااااااااااااا عاينه 10 عرسان اما نشوف بكره نقعد جمب الحيطه

ايه يا عمورة المواضيع النااااااااااار دي
بجد موضوع رائع
بصراحة كل حاجة كتبتها صح و صح الصح كمان
يعني فيه بنات كتيييييير بتبقى كدا
تعمل نفسها ايه اكلتها زى العصفورة
و بس اول ما خطيبها يتحرك من ادامها
تجري على المطبخ و تنزل كانها ما شافتش الاكل من سنة
يا عم دي بنات تفضح
شكرا يا عمرو على الموضوع الرائع
و ننتظر منك المزيد

ايه الموضوع جامدا ده بس سيبك

بس بنت اول ما تتخطيب بتكون احلى من اول بمية مرة من قبل الخطوبة اما بنسبة المطاعم بتكون اخر شياكة وهى بتاكل زى تخدت راحتها وتاكل براحة وهما كدة كدة فى المطاعم كل يوم اما مع اهالها او مع اصدقائها فى جامعة وبنت مش تاكل خلص لما تقلب السماء على الارض .

وهما اخر شياكة والاناقة