الوصفه السحريه للسهر ايام الامتحانات

بما إن الإمتحانات قربت و خلاص الوقت بيجري و احنا بنجري وراه.... و يوم الإمتحان سيكرم المرء أو يتهان.... ف النهاردة أنا جايب وصفة رائعة لراغبي التفوق و الدح و الذي منه ...

علشان كده أنا فكرت أقدم المشروب ده
هو مش أنا اللي مبتكره... الحق يتقال يعني .. .. بس لياالفخر أني أدخلت عليه تعديلات جوهرية للوصول للأثر الفعال ليه ....أيام و ليالي و أنا جوه معملي بجهز الخلطة السرية دي ... سهر وتعب و عرق و فيبكس علشان ما أنطردش من المعمل .... لحد ما في النهاية و صلت للوصفة السحرية للسهر اللا نهائي ...
ياللا هات ورقة و قلم أو أطلع باللاب توب على المطبخ ....

1. أنت دلوقتي تدخل المطبخ بتاعكم ...ويفضل انك تدخل برجلك اليمين ... و رجلك تكون غاسلها لزوم النضافة الشخصية ... ماشي يا عم ..

2. عاين مقدار نص كباية صغيرة و حطه في الإناء اللي هتغلي فيه المية مش هتفرق قوي إن كان براد شاي و لا كنكه ..

3. حط مقدار الشاي اللي بتعمله في الحقيقة لوحده في الإناء اللي اتفقنا من شوية إنه مش هيفرق كتير إن كان براد شاي و لا كنكه) يفضل نص ملعقة صغيرة ) و كمان معلقة بن صغيرة أو معلقتين و شوية أنت و رغبتك ... و قلبهم كويس مع المية قبل ما تحطهم على النار

4. الكباية بقى دي أهم حاجة و هي هتبقى آداة الجريمة .... حط فيها السكر حسب رغبتك بالكمية اللي تحبها... و على السكر أملأ لحد نص الكباية لبن…. يفضل اللبن الصابح ....

5. الشاي بالبن المغلي حطهم على اللبن و قلبهم كويس لحد ما يدوب السكر في اللبن

6. استمر في التقليب حتى سماع صوت الصفارة .....

7. أشرب المشروب السحري ده على طول لأنه هيبقى حرارته .... 40 درجة تقريبا ......الشرب بالفم بالطبع مش الأنف.... الفم اللي هو ساعات بيبقى بق و في البلد حدانا بيبقى حنك ... و يعرف في بعض بلاد الفرنجة بالماوس ...
8. المشروب ده طعمه رائع جداً جداً ما تخافش

9.أقعد ذاكر و أدعيلي

نصائح هامة جداً

1. لو عندك إرادة جامدة ممكن تكتفي بالبن و الشاي من غير لبن ...بس ده هيضر المعدة شوية.

2. لابد ألا تكون ممن يعانون من قرحة المعدة ...

3. لو كنت شارب شاي أو قهوة أنتظر ما لا يقل عن 5 ساعات قبل شراب هذا الاكسير .

4. يكتفي بكوب واحد يومياً ... كوباية صغيرة ... لأن كترته قد تسبب تقرحات في المعدة .
يا ريت أنا أقوم أذاكر علشان كده ما ينفعش خالص بقى
و بالهنا و الشفا و مترح ما يمشي يجري

جميلة اوى المعلومات دي يا اسلام
ربنا معاكم بقى لاني الحمد لله خلصت من قرف الامتحانات
ربنا معاك و مع كل اللى بيمتحنوا

هههههههههههههههه لا حلوة ياسولوم استمررر

بقىى وينصح لو كان البن والشاى اكسبيرد حيكون اجمد
وانشاء الله معيد قد الدنيا الحمدلله انى خلصت
lol!

خلاص يعنى كلكو خلصتو واحنا اللى ولاد تيت وبتشمتو فينا عقبالنا يارب
وعلى فكره انا مبعملهاش انا بعمل نسكافيه باللبن على الصبح ولما بحس انى عايز انام بدخل انام
وياااااااااااااااارب تنجح يا تتح